راديو الغزالين
1 . باسم الله بادي الحدادي - عصام عمر
2 . دبكة أشرف أبو الليل - عصام عمر
3 . محاورة زجل - موسى حافظ غانم الأسدي
4 . دبكه الدرازي - عوني الشوشاري
5 . مواويل - عصام عمر رفعت الأسدي
6 . شبابه 4 - هاني الشوشاري
7 . عشق الصبايا بهدله - عصام عمر
8 . أبو الورد - أشرف أبو اليل حسن أبو اليل
9 . يالله افتحو دارنا - غانم الأسدي
10 . لما تطل - ألياس جوليانوس

قصائد وأشعار

الرئيسية » التراث الفلسطيني » قصائد وأشعار » خواطر وأشعار من بنات أفكار الشاعر الفلسطيني تميم الأسدي ونعدكم بالمزيد
خواطر وأشعار من بنات أفكار الشاعر الفلسطيني تميم الأسدي ونعدكم بالمزيد

"صَباح الفُلّ"

قُطِّين 
مِشْمِش 
تَمْر
مِشّ أَحْلَى 
من كِلْمِه حِلْوِه تْقُولْها حِلْوِه 
كِلْمِة "صَباح الفُلّ" تِتْجَلَّى 
مِنْها الغُصُن عَلَى الغُصُن يِلْوِي 
قدِّيشْ حِلْو الفُلّ لَـمَّا يْطُلّ 
والبَسْمِه تُرْسُم نُورْها عَ الكُلّ 
يا عين شُوفي هالحَلَى 
وطُوفي 
ذُوقي صَباح الفُلّ بالنَّظْرَه
شوفي زْرَار الفُلّ مَنْعُوفِه 
أَحْلام عِشْق الجَمْرَ لِلْحُمْرَه 
رُفِّي عا كيفِكْ 
ظَلِّي كَيُّوفِه 
سيبِك من الآهات والحَسْرَه 
طُلِّي صَباح الفُلّ مَعْزوفِه 
نَغْنُوشِه تِتْعَرْبَش على الذِّكْرى 
يا عِشْق رَشْرِش عِطْرَك وعَرْبِش 
والقَلْب إنْعِش 
والزَّهِر إِكْمِش 
يا جِفْن لا تِرْمِش 
ولا تِخْدِش 
نَظْرِة العين 
بْهَالسِّحِر عَشِّش
حِلْوِه "صباح الفُلّ" 
شو حِلْوِه 
من حِلْوِه بِتْخَلِّي الحَياه حِلْوِه

 

بِسْم الهَوَى 
وآه النَّوَى يا مَصْر 
بِسْم الضَّفايِر 
والغِوَى 
والنَّهْر 
حُبِّكْ غُنا مَوَّال ساحِرْني 
بَسّ الظُّلُم يا مِصْر قاهِرْني
مِنِّي إِلِك دَمْع الفَرَح والشَّمْع 
يا مَشْرَبِيَّه عاشْقَه يا مَصْر 
يا سْطوح شَعْر يْلوح 
لَيل يْفوح 
ويْسُوح بالأَحْلام لَيل وْشَعْر 
قَلْبي هَدَاكي الحُبّ ضُمِّة زَهْر
بِالواد هايِم
بِالهَوا سارِح 
بالنِّيل عايِم
بالعِشِق فايِح 
يا خُبْز طَيِّب 
يا قَلَق إِنْسان 
قادِر يْفَجِّر فَجْر مِن صَدْرُو 
بْرُغْم أَسْرُو 
بْيِحْيا مِن قَبْرو 
بيقُوم مِن زَيّ المسيح يْزيح 
طُغْيان قاهِر عَدَّى جُوَّا القَصْر 
بْعَزْم ناصِر عاد يِمْحي الجَبْر 
وِيْصيح في وِجّ الظُّلُم والقَهْر 
يُكْتُب على شَطّ السِّويس الصَّبْر 
ويْعيد بُور سَعيد عيد النَّصْر 
أَسْمَر يا مَصْري 
والمَسا كورْنيش 
يا شَمِس نَصْري
لِلْحَياة تْعيش 
إِنْتي وأَنا الأَيَّام والذِّكْرى 
بُكْرَه أَنا وإِنْتي وَعِد يا مَصْر 
بُكْرَه أَنا وإنْتي وَعِد يا مَصْر

 

 

شو هَالقَلَق... 


شو هَالقَلَق يا بَحْر 
ما ذُقْت الخُشُوع 
جَزْرَك هُرُوب بْرَهْبِتَك 
مَدَّك دُمُوع 
الصَّخْر عا شَطَّك شو بِعْنيلَك 
في مَطْرَحُو باقي 
وما بِحْنيلَك 
مَوْجَك شَهَق يا بَحْر من هَوْلُو الشِّراع 
عُمْقَك نِزاع 
وبُعْدَك التَّايِه وَساع 
شو هَالقَلَق يَلْ قامَك وحَطَّك 
ما بين عِزّ العاصِفِه وْذُلّ الخُضُوع 
ورْياح فيك تْصارِع 
وغُرْبِه 
مِلْحَك ما بِخْلَص 
والأَسَى جُرْحَك 
من هيك فَرْحَك عايِش بْعُمْقَك قَنُوع

 

فَرْحَه بَعِد نَطْرَه


مَعْقول هيك بْتِعْمَل الكِلْمِه 
وبِتْغَيِّر الدِّنْيا بِقُدْرِتْها 
آه الخَواطِر من حَكي حَسَّاس 
مَعْقول يُجْبُر فيه كَسْرِتْها 
والعين فيها تِسْمَع وتِصْغي 
والذَّان فيها تْغُبّ نَظْرِتْها 
الكِلْمِه فيها تْغَيِّر الدِّنْيا 
من دِنْيا لَدِنْيا بْفِكْرِتْها 
مرَّات فيها تْصَحِّي وَعي النَّاس 
وياما وَعي بِصْحا بْسَكْرِتْها 
سَكْرِة أَحاسيس القُلوب تْذوب 
من كِلْمِه صَبَّت عِتْق خَمْرِتْها 
تُغْمُر نُفُوس بْنار شَعْلانِه 
وتْزيدها نيران غَمْرِتْها 
الكِلْمِه في آذار بِتْزَهِّر
وبْتِذْبَل بْأَيَّار زَهْرِتْها
مِثْل الصَّبِيِّه النَّاطْرَه من سْنين 
ذِبْلَت بَعِد ما النَّطْرَه قَهْرَتْها 
بَسّ الأمَل بالكِلْمِه شو خبَّر 
عن تَجْرِبِه من وحي خِبْرِتْها 
الكِلْمِة بِتْجَدِّد مواسِمْها 
وبِتْعيد للأيَّام ثَورِتْها 
الكِلْمِه يَلْ نَطْرَت تَنِسْمَعها 
مثِل الصَّبِيِّه ال نَطْرَت الأحْلام 
وفِرْحت بَعِد أَيَّام نَطْرِتْها

 

غَلاَّيِة القَهْوِه عَ جَمْر النَّار 

إِغْلِيها حَتَّى تْفُور... 
وْلَـمَّا تْرُوق 
صُبِّي الحَكي فِنْجان 
وِجْهُو نْهار 
ما بين حَكي وجْنون 
نِفْسي ذُوق... 
مَحْروق قَلْبي إسْمَع الأَخْبار 
فِنْجان ثاني 
عاشِق ومَعْشوق 
والعِشْق شاعِل نار 
شو اللي صار... 
يا قَهْوِه مَحْرُوقَه 
على مَحْرُوق

 

عِشْنا وْغِبْنا 

ويوم مَ رْجِعْنا 
حَسِّينا بْإِشْيا بِتِوْجِعْنا 
شو كان؟! 
شو صار؟! 
وبِهَالرِّحْلِه شو تْغَيَّر؟ 
وشو اللي جَرَى مَعْنا؟ 
من هَالمعاني ما بِقي جُمْلِه 
نِحْكيها... 
أَو نِتْعَلَّق بْمَعْنى 
هالرَّجْعَه بَعْد الغَيْبِه مِشّ سَهْلِه 
ما عاد مَعْنى اليوم يِجْمَعْنا!! 
شو ظَلّ من ظِلّ الحكي فَضْلِه 
ما فيها من هَالجَوّ تِطْلِعْنا 
شَغْلِه غَريبِه!! 
الذِّكْرى مِنْشِغْلِه بْأَوقات ما عاد فيها تِنْفَعْنا 
من هيك رَحْ أَمْشي على مَهْلي 
شو عَم بِصير اليوم ما بَعْرِف 
إن كان بُكْرَه من الـمَشي وْقِعْنا

 

ظاهِر عُمَر ظاهِر 

ظاهِر عُمَر لَو غيَّبُوه ظاهِر قَهْر الـمَنِيِّه بالعُمُر قاهِر 
عُمْر الخُلُود الباقي مَهْما راح عُمْر الوُجود بْكُلّ دَهِر داهِر 
وجْراح من آلام تِبْكي جْراح آمال تِحْكي عَصر مِشّ عابِر
لَيْل الحَزين يْوَلِّد الأَفْراح من نور شَمْس ويُنْصُر الصَّابِر 
ظاهِر ليالي الحُزْن عنَّا زاح بِطْمُوح إصْرار وْقِوى ناصِر
لَو حاصَروه في ساح حَرَّر ساح من نَهْر دافِق لَبَحِر هادِر 
من قَلْب مُؤْمِن بالإِرادِه صاح من وعْي قادْ الـمَعْرَكِه قادِر 
عكَّا بِتُذْكُر والنِّجِم وَضَّاح عَ جْبينها وأُفْق السَّما ذاكر 
لوما "أَبو صْليبي" صَليب كْفاح وْلا سُور في عَكَّا بِقِي عامِر
لوما النِّسِر يُخْفُق بِأُفْقُو جْناح ما كان حِلْم بْخَفْقِتُو طايِر 
يا ناصِر بْأَرْض الشَّقا الفَلاَّح يا جابِر بْعَطْف اللُّقا الخاطِر 
عَهْدَك بْعَيش ومِلْح عاشُوا مْلاح والكُلّ بْوِحْدِة هَدَف شاعِر
يا مْكَوِّن التَّحْرير والإِصْلاح فيك الكِيان اليَعْرُبي يْفاخِر 
بِسْيوف تُضْرُب بالوَغَى ورْماح تِطْعَن وْنار مْهَرْبِجِه تْناوِر 
طَمَّاح إسْمَك للسَّما طَمَّاح شَعْب وأَرِض فيك الـمَثَل سايِر
تاريخ مَجْدَك للذَّكي اللَّمَّاح سيرِة إِبا كابِر بَعِد كابِر
تاريخ بُنْقُض شو حَكُوا شُرَّاح صِدْق الـمُحاضِر للنَّقِض حاضِر 
هَالأَرض فيها ساكْنِه أَرواح من طيبْها نَفْح الثَّرى عاطِر 
كُلْما زَهِر آذار طَلّ وْفاح بِتْفُوح مع فَوْح الشَّذا الزَّاهر
كُلْما غَزَل شيح العُذوبِه وْشاح بِتْلُوح مع بَوح العَذَى النَّاشِر 
مَنْديل "عايْشِه" بالهَوا لَوَّاح من زَيّ شاعِر بالهَوى شاعِر 
روحَك يا ظاهِر راحِة الإصْحاح والسُّورَه، نور الهَدْي للنَّاظِر 
كُلّ مُرْتَزَق بالمال سَلّ سْلاح بالـمال صَفَّى للوَعي غادِر
كُلْمِن بِحارِب من أَجِل أَرْباح مالُو قَضِيِّه بْماضي أَو حاضِر
وكُلْمِن بِحالِف بالحَياه سَفَّاح إِسْـمُو بِـمَوْتُو فِعْلِتُو ناكِر
نِحْنا ما جينا هَالأَرِض سُوَّاح من هَالأرِض نِحْنا شَعِب قادر 
لَو مَهْما هَبَّت عَ الجِبال رْياح تِبْقَى الْجِبال ويـُمْرُق العابِر
والشَّمْس تِشْرِق مع فَجِر صَبَّاح من بَعْد ليل من الأَسى الغايِر 
يا ظاهِر بـْجَنِّة ثَراك إِرْتاح ما غاب ظاهِر والطُّموح وْجود 
ظاهِر عُمَر في كُلّ عُمُر ظاهِر

 

أغاني
أغاني MP3